ກອງປະຊຸມຄະນະກຳມະການທົບທວນການຈັດຕັ້ງປະຕິບັດ ໂຄງການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ຄັ້ງທີ IX

ກອງປະຊຸມຄະນະກຳມະການທົບທວນການຈັດຕັ້ງປະຕິບັດ ໂຄງການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ຄັ້ງທີ IX

ຂ່າວສຳຄັນ

ໃນ​​ຕອນ​ເຊົ້າຂອງ ​ວັນທີ 10 ທັນວາ 2020 ທີ່​​ໂຮງ​ແຮມ ຄຣາວພລາຊາ, ນະຄອນຫຼວງວຽງຈັນ ກົມສົ່ງເສີມວິສາຫະກິດຂະໜາດນ້ອຍ ແລະ ກາງ (ກສວ), ກະຊວງອຸດສາຫະກໍາ ແລະ ການຄ້າ ໄດ້ຈັດ​ກອງ​ປະ​ຊຸມ​ຄະນະກໍາມະການທົບ​ທວນ​ການຈັດ​ຕັ້ງ​ປະ​ຕິ​ບັດ ໂຄງ​ການເຂົ້າ​ເຖິງ​ແຫຼ່ງ​ຂອງວິ​ສາ​ຫະ​ກິດຂະໜາດນ້ອຍ ແລະ ກາງ ຫຼື SME Access to Finance Project ຄັ້ງທີ IX ​ຂຶ້ນ ຊຶ່ງເປັນກອງປະຊຸມຄັ້ງສຸດທ້າຍຂອງໂຄງການ ​ໂດຍ​ພາຍ​ໃຕ້​ການ​ເປັນ​ປະ​ທານ​ຂອງ​ ທ່ານ ບຸນເຖິງ ດວງສະຫວັນ ຫົວໜ້າ​ກົມ​ສົ່ງ​ເສີມວິ​ສາ​ຫະ​ກິດ​ຂະ​ໜາດ​ນ້ອຍ ແລະ ກາງ, ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ. ມີ​ຜູ້​​ຕາງ​ໜ້າ​ຈາກ​ຫ້ອງການທະນາຄານໂລກປະຈໍາ ສປປ ລາວ, ທະ​ນາ​ຄານ​ໂລກ, ກະຊວງການເງິນ, ທະ​ນາ​ຄານ​ແຫ່ງ ສ ປ ປ ລາວ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ທະນາຄານພັດທະນາລາວ ແລະ 04 ທະນາຄານທີ່ເຂົ້າຮ່ວມໂຄງການ (ທະນາຄານລາວຈີນ, ທະນາຄານເອັສທີ, ທະນາຄານຊາຄອມແບັງລາວ ແລະ ທະນາຄານຮ່ວມທລຸະກິດ ລາວຫວຽດ).

ຈຸດປະສົງກອງປະຊຸມເພື່ອລາຍງານຄວາມຄືບໜ້າການຈັດຕັ້ງປະຕິບັດໂຄງການໄລຍະ 6 ເດືອນທ້າຍປີ 2020, ຜົນໄດ້ຮັບຂອງໂຄງການ, ຖອດຖອນບົດຮຽນການຈັດຕັ້ງປະຕິບັດນະໂຍບາຍສິ່ງແວດລ້ອມ ແລະ ສັງຄົມ ເຂົ້າໃນການປ່ອຍກູ້ໃຫ້ SME ແລະ ການກະກຽມປິດໂຄງການໃນວັນທີ 21 ທັນວາ 2020.

ໃນໄລຍະ 6 ເດືອນທ້າຍປີ 2020 ໄດ້ສໍາເລັດການສ້າງແຜນຍຸດທະສາດສິນເຊື່ອທະນາຄານສໍາລັບ SME ໃຫ້ທະນາຄານພັດທະນາລາວ, ທະນາຄານຊາຄອມແບັງລາວ ແລະ ທະນາຄານຮ່ວມທຸລະກິດ ລາວຫວຽດ; ສໍາເລັດການສະໜັບສະໜູນງານເທດສະການສະຕາດອັບ 2020 ໂດຍການຮ່ວມມືລະຫວ່າງ ກົມສົ່ງເສີມ SME ກັບ ສະມາຄົມໄອທີລາວ ທີ່ໄດ້ຈັດຂຶ້ນທີ່ ສູນການຄ້າວຽງຈັນເຊັນເຕີ ໃນລະຫວ່າງ ວັນທີ 3-6 ທັນວາ 2020; ສະໜັບສະໜູນ ພະແນກອຸດສາຫະກໍາ ແລະ ການຄ້າ ແຂວງ ຈັດກອງປະຊຸມທົບທວນການຈັດຕັ້ງປະຕິບັດແຜນພັດທະນາ SME 2016-2020 ຂອງແຂວງ ຊຶ່ງສໍາເລັດແລ້ວ 11 ແຂວງ. ສໍາລັບການປ່ອຍກູ້ໃຫ້ແກ່ SME ຕັ້ງແຕ່ເດືອນມັງກອນ ຫາ ຕຸລາ ປີ 2020 ທະນາຄານທີ່ເຂົ້າຮ່ວມໂຄງການສາມາດນໍາໃຊ້ເງິນລູກຄ້າເກົ່າຊໍາລະຄືນໝູນປ່ອຍກູ້ໃຫ້ລູກຄ້າລາຍໃໝ່ໄດ້ຈໍານວນ 29 ຫົວໜ່ວຍ, ມູນຄ່າ 15,41 ຕື້ກີບ. ສັງລວມແລ້ວເລີ່ມແຕ່ຈັດຕັ້ງປະຕິບັດໂຄງການ ເດືອນ ກັນຍາ 216 ຮອດເດືອນ ຕຸລາ 2020 ສາມາດປ່ອຍກູ້ໃຫ້ SME ໄດ້ 195 ສັນຍາ, ຈຳນວນ 188 ຫົວໜ່ວຍ ມູນຄ່າ 128,41 ຕື້ກີບ.