ສະຫະກອນ ຜະລິດກາເຟຄຸນນະພາບຈິງໃຈ ເຂົ້າຫາແຫຼ່ງທຶນອັດຕາດອກເບ້ຍ 3% ຕໍ່ປີ

ສະຫະກອນ ຜະລິດກາເຟຄຸນນະພາບຈິງໃຈ ເຂົ້າຫາແຫຼ່ງທຶນອັດຕາດອກເບ້ຍ 3% ຕໍ່ປີ

fund

ວິສາຫະກິດ ສະຫະກອນຜະລິດກາເຟຄຸນນະພາບຈິງໃຈ ຕັ້ງ​ຢູ່ບ້ານຫຼັກ 5, ​ເມືອງ​ປາກ​ຊ່ອງ ​ແຂວງ​ຈຳປາ​ສັກ ມີປະທານສະຫະກອນແມ່ນ ທ່ານ ຄໍາສຸກ ແກ້ວບົວພາ ​ຊຶ່ງສະຫະກອນດັ່ງກ່າວ ປະກອບມີ 30 ຄອບຄົວ​. ທ່ານ ຄໍາສຸກ ໄດ້ເລົ່າວ່າ ຄອບຄົວເພິ່ນໄດ້ເລີ່​ມ​ປູກ​ກາ​ເຟ​ແຕ່​ປີ 1945 (75 ປີ) ສະ​​ໄໝ​ລຸ້ນປູ່, ​ເລີ່​ມຕົ້ນ​ໃນ​ເນື້ອ​ທີ່ 6 ​​ເຮັກຕາ ຕົກທອດມາຮອດ ທ່ານ ຄໍາສຸກ ໃນ​ປີ 2000 ແລະ ໄດ້​​ເຮັດ​ທຸລະ​ກິດ​ປູກ​ກາ​ເຟດ້ວຍ​ຕົນ​ເອງ​ໃນ​ເນື້ອ​ທີ່ 23 ​ເຮັກຕາ ​ເຊິ່ງ​​ປູກ​​ສອງ​ສາຍ​ພັນຕົ້ນຕໍ​ຄື: ​ໂລ​ບັດ​ສຕ້າ ​ແລະ ອາ​ລະ​ບີ​ກາ. ຜົນ​ຜະລິດ​ກາ​ເຟ​ແມ່ນ 160 ​ໂຕນ ໝາກ​ແດງ (ກາ​ເຟບໍ່​ທັນ​ແຫ້ງ) ຕໍ່​ປີ ​ເຊິ່ງ​ໃນ​ຈຳນວນກາ​ເຟ​ໝາກ​ແດງ (ບໍ່​ທັນ​ແຫ້ງ) 5 ​ໂຕນ ມີຈໍານວນເທົ່າກັບ 1 ​ໂຕນ ໝາກ​ຂາວ (​ແຫ້ງ). ທ່ານ ໄດ້ຮັບສິນເຊື່ອອັດຕາດອກເບ້ຍ 3% ຕໍ່ປີ ຈາກທະນາຄານຊາຄອມແບັງລາວ ມູນຄ່າ 300 ລ້ານກີບ ເປັນທຶນໝູນວຽນ​ໃນ​ການ​ຊື້​ອຸປະກອນ​ຮັບ​ໃຊ້​ສວນ​ກາ​ເຟ, ການ​ຕັດ​ຕອນ​ກາ​ເຟ 10 ​ເຮັກຕາ (ວິທີນີ້ໄວກວ່າການປູກກາເຟໃໝ່ເຖິງ 1 ປີ), ຊື້​ແນວ​ພັນ​ປູກ​ກາ​ເຟ, ຊື້​ເຄື່ອງ​ຈັກ ​ແລະ ຄ່າ​ໃຊ້​ຈ່າຍ​ອື່ນໆ ຍ້ອນທະນາຄານເຫັນປະຫວັດການເຮັດທຸລະກິດ ທີ່ມີຄວາມຕັ້ງໃຈເຮັດແທ້ທໍາຈິງ, ມີແຜນທຸລະກິດການນໍາໃຊ້ເງິນທີ່ຖືກເປົ້າໝາຍ ແລະ ມີຜົນປະກອບການທີ່ດີ. ທ່ານ ຄໍາສຸກ ໄດ້ຜ່ານການຝຶກອົບຮົມການຂຽນແຜນທຸລະກິດ, ແຜນການເງິນ ແລະ ການບັນຊີ ເປັນທີ່ຮຽບຮ້ອຍແລ້ວ ແລະ ກຳລັງກະກຽມການເຂົ້າລະບົບບັນຊີໃຫ້ຖືກຕ້ອງຕາມກົດໝາຍວ່າດ້ວຍການບັນຊີໃຫ້ສໍາເລັດພາຍໃນປີ 2021. ນັບ​ແຕ່ປີ 2015 ເປັນຕົ້ນມາ ວິສາຫະກິດສະຫະກອນຈິງໃຈ ສາມາດ​ສົ່ງ​ກາ​ເຟໃຫ້​ຮ້ານ​ກາ​ເຟ ​ເລີ​ທຣີ​ໂອ (Le Trio) ຈຳນວນ 10-13 ​ໂຕນ ຕໍ່​ປີ, ນອກ​ນີ້​ກໍ່​ຍັງ​ສົ່ງ​ໄປ​ປະເທດໄທ 5 ​ໂຕນ ​ຕໍ່​ປີ. ໃນ​ຊ່ວງ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ​ເຮັດ​ໃຫ້​ຍອດ​ການ​ສັ່ງ​ຊື້ຫຼຸດ​ລົງ ​ເຊັ່ນ ​ປົກກ​ະຕິລູກຄ້າຢູ່ຫຼວງພະບາງ ​ສັ່ງ​ຊື້ 300 ກິ​ໂລ ​ຕໍ່​ເດືອນ ​ແຕ່​ປັດຈຸບັນ​ໄດ້​ຂໍ​ໂຈະ​ການ​ສັ່ງ​ຊື້ ​ເນື່ອງ​ຈາກ​ວ່າ​ ບໍ່​ມີ​ນັກ​ທ່ອງ​ທ່ຽວ ແລະ ລູກຄ້າຫຼາຍລາຍກໍ່ຫຼຸດຈໍານວນການສັ່ງຊື້ລົງ ເຮັດໃຫ້ສູນເສຍລາຍຮັບຈໍານວນຫຼາຍ. ທະນາຄານຊາຄອມແບັງລາວ ກໍ່ມີນະໂຍບາຍໃຫ້ຈ່າຍແຕ່ດອກເບ້ຍກ່ອນ ເປັນເວລາ 1 ປີ, ຫຼັງຈາກນັ້ນ ຈຶ່ງຈ່າຍທັງຕົ້ນທຶນ ແລະ ດອກເບ້ຍ ເພື່ອຊ່ວຍເຫຼືອຜູ້ປະກອບກິດຈະການໃຫ້ມີສະພາບຄ່ອງໃນການດໍາເນີນທຸລະກິດ. ໃນອະນາຄົດ ທ່ານ ຄໍາສຸກ ມີແຜນຢາກສ້າງແບຣນກາເຟເປັນຂອງຕົນເອງ ຊຶ່ງກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ແມ່ນມີການສະໜອງທຶນໂຄງການສົ່ງເສີມວິຊາການ ເພື່ອຊ່ວຍເຫຼືອ ຊຸກຍູ້ ແລະ ສ້າງຄວາມເຂັ້ມແຂງໃຫ້ແກ່ SME ຈຶ່ງໄດ້ແນະນໍາໃຫ້ ທ່ານ ຄໍາສຸກ ຂຽນບົດສະເໜີໂຄງການ​ວິຊາ​ການ ຂໍທຶນຈາກ ທສວ.