ກອງປະຊຸມວິຊາການ ໃນຫົວຂໍ້: “ລະບຽບການດ້ານອາຫານປອດໄພ ແລະ ບັນຫາທີ່ກ່ຽວຂ້ອງ”

ກອງປະຊຸມວິຊາການ ໃນຫົວຂໍ້: “ລະບຽບການດ້ານອາຫານປອດໄພ ແລະ ບັນຫາທີ່ກ່ຽວຂ້ອງ”

apo

ກົມສົ່ງເສີມວິສາຫະກິດຂະໜາດນ້ອຍ ແລະ ກາງ (ກສວ), ກະຊວງອຸດສາຫະກຳ ແລະ ການຄ້າ ໃນຖານະທີ່ໄດ້ຮັບມອບໝາຍຈາກລັດຖະບານ ໃຫ້ເປັນຈຸດປະສານງານກັບອົງການຜະລິດຕະພາບແຫ່ງອາຊີ (Asian Productivity Organization ຫຼື APO)​ ​ແລະ ​ເປັນ​ອົງການ​ຜະລິດ​ຕະພາບ​ ຂອງ ສ ປ ປ ລາວ ໄດ້​ເປັນເຈົ້າພາບຮ່ວມກັບອົງການ APO ຈັດ​ກອງປະຊຸມວິຊາການ​ໃນ​ຫົວ​ຂໍ້: “ລະບຽບການດ້ານອາຫານປອດໄພ ແລະ ບັນຫາທີ່ກ່ຽວຂ້ອງ” (Workshop on Food Safety Regulations and Related Issues ) ໃນວັນ​ທີ 16-20 ທັ​ນ​ວາ 2019 ຢູ່ທີ່​ໂ​ຮງ​ແຮມ ນິວໂຣສ, ນະຄອນຫຼວງວຽງຈັນ.

ກອງປະຊຸມວິຊາການໃນ​ຄັ້ງນີ້ ໃຫ້ກຽດເປັນປະທານຮ່ວມໃນພິທີເປີດໂດຍ ທ່ານ ບຸນເຖິງ ດວງສະຫວັນ ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ທັງເປັນກຳມະການບໍລິຫານອົງການຜະລິດຕະພາບແຫ່ງອາຊີຂອງ ສປປ ລາວ ແລະ ປອ. ອາໄຊທຳບິ ມານິຄຳ (Dr. Asaithambi Manickam) ຫົວໜ້າໂຄງການ, ພະແນກກະສິກຳຂອງອົງການຜະລິດຕະພາບແຫ່ງອາຊີ, ມີຜູ້ເຂົ້າຮ່ວມທັງໝົດ 24 ທ່ານ. ໃນນີ້, ເປັນນັກວິທະຍາກອນ 03 ທ່ານ ຈາກປະເທດອິນເດຍ ແລະ ສິງກະໂປ, ເປັນນັກສໍາ​ມະ​ນາກ​ອນ ​ ​ຈຳນວນ 21 ທ່ານ ຈາກ 12 ປະເທດ ຄື:  ບັງກລາເທດ, ກຳປູເຈຍ, ຟິຈິ, ອິນເດຍ, ອິນໂດເນເຊຍ, ສປປ ລາວ, ມົງໂກລີ, ປາກິດສະຖານ, ຟິລິບປິນ, ສີລັງກາ, ໄທ ແລະ ຫວຽດນາມ. ຈຸດປະສົງຂອງກອງປະຊຸມຄັ້ງນີ້ແມ່ນເພື່ອ: 1. ທົບທວນຄືນທ່າອ່ຽງປະຈຸບັນຂອງບັນດາລະບຽບການດ້ານອາຫານປອດໄພ ແລະ ແລກປ່ຽນຕົວຢ່າງທີ່ປະສົບຜົນສຳເລັດຂອງບັນດາລະບຽບການດັ່ງກ່າວທີ່ຈະສ້າງໃຫ້ລະບົບຄຸ້ມຄອງອາຫານປອດໄພແຫ່ງຊາດເຂັ້ມແຂງໃນດ້ານການປັບປຸງອາຫານປອດໄພ, ຜະລິດຕະພາບແຮງງານ ແລະ ສາທາລະນະສຸກ. 2. ເພື່ອຄົ້ນຄວ້າວິໄຈສິ່ງທ້າທາຍ, ກໍານົດຍຸດທະສາດ ແລະ ການຈັດຕັ້ງປະຕິບັດທີ່ຈໍາເປັນຕໍ່ການແກ້ໄຂບັນຫາຕ່າງໆເຫຼົ່ານັ້ນ ທັງໃນປະຈຸບັນ ແລະ ອະນາຄົດ ເພື່ອຮັບປະກັນດ້ານອາຫານປອດໄພໃນປະເທດສະມາຊິກອີກດ້ວຍ. ພ້ອມນີ້, ຜູ້ເຂົ້າຮ່ວມຍັງໄດ້ລົງທັດສະນະສຶກສາຢູ່ໂຮງງານເບຍລາວ ເພື່ອຮຽນຮູ້ ແລະ ແລກປ່ຽນບົດຮຽນກ່ຽວກັບການດຳເນີນງານ, ການຜະລິດ, ລະບຽບການຄຸ້ມຄອງຕ່າງໆຂອງໂຮງງານ ລວມໄປເຖິງການທ່ຽວຊົມພາຍໃນໂຮງງານຕື່ມອີກ.

ນອກຈາກນັ້ນ​, ກອງປະຊຸມຍັງຈະໄດ້​ສົນທະນາ ​ແລະ ​ແລກປ່ຽນ​ບົດຮຽນເຊິ່ງກັນ ແລະ ກັນລະຫວ່າງວິທະຍາກອນ ແລະ ນັກສຳມະນາກອນ​ກ່ຽວ​ກັບ​ກໍ​ລະ​ນີສຶກສາ​ຕ່າງໆ ແລະ ນຳສະເໜີແຜນຈັດຕັ້ງປະຕິບັດຂອງແຕ່ລະປະເທດ. ພາຍ​ຫຼັງ​ສຳ​​ເລັດ​ກອງປະຊຸມດັ່ງກ່າວ ຜູ້​ເຂົ້າ​ຮ່ວມ​ຈະ​ສາມາດ​ນຳເອົາບົດຮຽນທີ່ຖອດຖອນໄດ້ນັ້ນນຳ​ໃຊ້​ຄວາມຮູ້ຕ່າງ​ໆເຫຼົ່ານັ້ນເຂົ້າ​ໃນ​ການ​ສ້າງແຜນຍຸດທະສາດ ​ແລະ ປັບປຸງລະບຽບການດ້ານອາຫານປອດໄພ ແລະ ບັນຫາທີ່ກ່ຽວຂ້ອງອື່ນໆ.

ສປປ ລາວ ​ເຂົ້າ​ເປັນ​ສະມາຊິກ​ຂອງ​ອົງການ APO ​ໃນ​ປີ 2002 ​ແລະ ໄດ້ຮັບການຊ່ວຍເຫຼືອຈາກອົງການດັ່ງກ່າວຢ່າງ​ຕໍ່​ເນື່ອງ ໃນການສົ່ງ​ເສີມວຽກງານຜະລິດຕະພາບ,  ເປັນຕົ້ນແມ່ນການສົ່ງ​ພະນັກງານ ທັງ​ພາກ​ລັດ ​ແລະ ພາກ​ທຸ​ລະ​ກິດ ເຂົ້າຮ່ວມກອງປະຊຸມສໍາມະນາ, ຝຶກອົບຮົມ, ການໄປທັດສະນະສຶກສາ, ການແລກປ່ຽນບົດຮຽນ ​ແລະ ອື່ນໆ ທັງ​ຢູ່​ພາຍ​ໃນ ​ແລະ ຕ່າງ​ປະ​ເທດ ​ໃນ​ແຕ່ລະ​ປີ​ບໍ່​ຕ່ຳ​ກວ່າ 60 ​ໂຄ​ງການ. ພ້ອມ​ນັ້ນ ກໍ່​ໄດ້​ຮັບ​ການ​ຊ່ວຍ​ເຫຼືອ​ທາງ​ດ້ານ​ທຶນຮອນ ​ແລະ ​ເຕັກນິກ​ວິ​ຊາ​ການ ​ເຂົ້າ​ໃນ​ການ​ສ້າງ​ບໍລິສັດ ​ແລະ ໂຮງງານຕົວແບບ ໃນການ​ນຳ​ໃຊ້​ເຄື່ອງມື ​ແລະ ​ເຕັກ​ນິກການ​ເພີ່ມຜະລິດຕະພາບ​ເຊັ່ນ : 5ສ, ໄຄເຊັນ, ມາດຕະຖານ ISO, ການຜະລິດທີ່ດີ (GMP), ລະບົບຄຸ້ມຄອງອາຫານປອດໄພໂດຍການໍາໃຊ້ ລະບົບວິເຄາະ ແລະຄວບຄຸມຈຸດວິ​ກິດ (Hazard Analysis Cricitical Control Point – HACCP). ​ໄປ​ຄຽງ​ຄູ່​ກັນ​ນັ້ນ, ສປປ ລາວ ກໍ່​ໄດ້​ປະຕິບັດ​ພັນທະ​ຂອງ​ຕົນ​ໃນ​ການ​ເປັນ​ເຈົ້າພາບ​ຈັດ​ກອງ​ປະຊຸມ​ສຳ​ມະ​ນາ ​ແລະ ຝຶກ​ອົບຮົມ 1-2 ຄັ້ງ​ຕໍ່​ປີ.