ລ້ຽງປາກະຊັງ ເຂົ້າຫາແຫຼ່ງທຶນອັດຕາດອກເບ້ຍ 3% ຕໍ່ປີ

ລ້ຽງປາກະຊັງ ເຂົ້າຫາແຫຼ່ງທຶນອັດຕາດອກເບ້ຍ 3% ຕໍ່ປີ

ຂ່າວສຳຄັນ

ວິສາຫະກິດສ່ວນບຸກຄົນລ້ຽງປາກະຊັງ ຂອງ ທ່ານ ຄຳ​ພູນ ​ແສງ​ປະທີບ ຕັ້ງຢູ່ບ້ານໂນນ​ສະຫວ່າງ, ​ເມືອງ​ປາກ​ເຊ, ​ແຂວງ​ຈຳປາ​ສັກ ​ດຳ​ເນີນ​ທຸລະ​ກິດ​ລ້ຽງ​ປາ​ກະຊັງຢູ່ແຄມ​ນ້ຳຂອງ, ເລີ່​ມດຳ​ເນີນ​ທຸລະ​ກິດ​ແຕ່ປີ 2006 ​ໂດຍ​ມີ​ກະຊັງ​ລ້ຽງ​ປາພຽງ​ແຕ່ 10 ກະຊັງ ຕໍ່​ມາ​​​ເມື່ອທ່ານ ຄຳ​ພູນ ​ເຫັນ​ວ່າ​ທຸລະ​ກິດ​ຂອງ​ຕົນ​ມີ​ທ່າ​ກ້າວ ສະ​ນັ້ນ​ຈຶ່ງມີ​ແຜນ​ຢາກ​ຂະຫຍາຍ​ທຸລະ​ກິດ ​ໂດຍ​ໄດ້​ກູ້​ຢືມ​ເງິນ​ນຳ​ທະນາຄານ​ພັດທະນາ​ລາວ ບ້ວງ​ເງິນ 32 ຕື້​ກີບ ​ໃນປີ 2016 ຈຳນວນ 1,5 ຕື້​ກີບ ​ເພື່ອ​ເປັນ​ທຶນ​ຄົງ​ທີ່​ ​ແລະ ​ທຶນ​ໝູນວຽນ ​ເຮັດ​​ໃຫ້​ທຸລະ​ກິດ​ຂອງ​ທ່ານ ຄຳ​ພູນ ມີ​ການ​ຂະຫຍາຍຕົວ​ເພີ່​ມຂຶ້ນ ​ແລະ ມີ​ລາຍ​ຮັບ​ເພີ່ມ​ຂຶ້ນ ​ຈົນ​ເຖິງມີ​ຄວາມ​ສາມາດ​ໃນ​ການ​ປິດ​ໜີ້​ນຳ​ທະນາຄານ.​ ​​ເມື່ອ​ທ່ານ ຄຳ​ພູນ ​ເຫັນ​ການ​ໂຄສະນາ​ເຜີຍ​ແຜ່​ບ້ວງ​ເງິນ​ກູ້​ດອກ​ເບ້ຍ 3% ຕໍ່​ປີ ​ເພິ່ນ​ກໍ່​ມີ​ຄວາມ​ສົນ​ໃຈ ​ແລະ ຢາກ​ເຂົ້າ​ເຖິງ​ເງິນ​ກູ້​ບ້ວງ​ນີ້​ເພື່ອ​ຂະຫຍາຍ​ທຸລະ​ກິດ ຍ້ອນ​ທ່ານ ຄຳ​ພູນ ​ເປັນ​ລູກ​ຄ້າ​ຊັ້ນ​ດີ​ຂອງ​ທະນາຄາ​ນພັດທະນາລາວ ຊໍາລະໜີ້​ຕົງ​ເວ​ລາ​ທຸກ​ຄັ້ງ ​ຈຶ່ງ​ສາມາ​ດ​ໄດ້​ຮັບ​ສິນ​ເຊື່ອ​ບ້ວງ​ນີ້​ໄດ້ ຈຳນວນ 2 ຕື້​ກີບ ​ເປັນ​ທຶນ​ໝູນວຽນ​ໃນ​ການ​ຂະຫຍາຍ​ກະຊັງ​ປາ, ສ້ອມ​ແປງ​ກະຊັງ​ເກົ່າ, ຊື້​ລູກປາ ​ແລະ ຫົວອາຫານ. ​ເຖິງວ່າ ​ທ່ານ ຄຳ​ພູນ ຍັງ​ບໍ່​ທັນ​ໄດ້​ຖື​ບັນຊີ​ຕາມ​ກົດໝາຍ​ວ່າ​ດ້ວຍ​ການ​ບັນຊີ​ກໍ່ຕາມ ​ແຕ່​ທາງ​ທະນາຄານ​ກໍ່​ໄດ້​​ເຮັດ​ສັນຍາ ​ໃຫ້​ເວລາ 1 ປີ ​ໃນ​ການ​ເຂົ້າ​ລະບົບ​ບັນຊີ​ໃຫ້​ຖືກຕ້ອງ​ຕາມ​ລະບຽບ ​ເຊິ່ງທາງ​ລູກ​ຄ້າ​ເອງກໍ່​​ໄດ້ກຽມ​ຄວາມ​ພ້ອມ​ໃນ​ການ​ເລີ່​ມສຶກສາລະ​ບົບ, ​ເກັບ​ບິນ, ​ແລະ ລົງ​ບັນຊີ. ຫຼັງ​ຈາກ​ໄດ້​ຮັບ​ເງິນ​ກູ້​ 2 ຕື້​ກີບ ຈາກ​ທະນາຄານ​ພັດທະນາ​ລາວ  ​ເຮັດ​ໃຫ້ທຸລະ​ກິດ​ຂອງ​ທ່ານ ຄຳ​ພູນ ມີ​ກະຊັງ​ລ້ຽງ​ປາ 140 ກະຊັງ (​ເພີ່ມ​ຂຶ້ນ 40 ກະຊັງ), ພະນັກງານ​ທັງ​ໝົດ 18 ຄົນ (ຈ້າງງານ​ເພີ່ມ​ຂຶ້ນ 6 ຄົນ), ສາມາດ​ຂາຍ​ປາ​ໄດ້ 850 ກິ​​ໂລ ຕໍ່​ມື້ ​ແລະ ມີ​ລາຍ​ຮັບ ​3 ຕື້ກີບ ຕໍ່​ປີ.

​ທ່ານ ຄຳ​ພູນ ໄດ້ເລົ່າໃຫ້ຟັງວ່າ ກ່ອນ​ທີ່​ທຸລະ​ກິດ​ຂອງ​ທ່ານ​ຈະ​ປະສົບ​ຜົນສຳ​ເລັດ​ໄດ້​ທຸກ​ມື້​ນີ້ ເພິ່ນ​ໄດ້​ພົບ​ສິ່ງ​ທ້າ​ທາຍ​ຫຼາຍ​ຢ່າງ ບໍ່​ວ່າ​ຈະ​ເປັນແຮງກົດດັນຈາກ​ຄູ່​ແຂງເພີ່ມຂຶ້ນ, ​ໄພ​ພິບັດ​ນ້ຳ​ຖ້ວມ ​ແລະ ຜົນ​ກະທົບ​ຈາກການ​ແຜ່​ລະບາດ​ຂອງພະຍາດ​ໂຄວິດ-19 ​ເຊິ່ງເພິ່ນ​ກໍ່​ໄດ້​ໃຊ້​ຫົວຄິດ​ປະດິດ​ສ້າງ​ເຮັດໃຫ້ສາມາດ​ຜ່ານ​ຜ່າ​ຂໍ້​ຫຍຸ້ງຍາກ​ຕ່າງໆ​ໄປ​ໄດ້. ໃນຊ່ວງ​ໄພ​ນ້ຳ​ຖ້ວມ ທ່ານ ຄຳ​ພູນ ​ໄດ້​ແປ​ຮູບ​ປາ​ນິນ ​ເປັນ​ປາ​ແດກ, ​ແລະ ຊ່ວງການ​ແຜ່​ລະບາດ​ຂອງພະຍາດ​ໂຄວິດ-19 ​ເຮັດ​ໃຫ້​​ໂຮງ​ແຮມ, ຮ້ານ​ອາຫານ​ຍົກ​ເລີກ​ການ​ສັ່ງຊື້​ປາ ​ເຊິ່ງເພິ່ນໄດ້​​​ແກ້​ບັນຫາ​ດ້ວຍ​ການ​ຂົນ​ປາ​ໃສ່​ລົດ​ໄປເລາະຂາຍດ້ວຍ​ຕົວເອງ​​ໃຫ້​ກັບ​ປະຊາຊົນແຕ່​ລະ​ບ້ານ ​ເຊິ່ງ​ໄດ້​ຮັບ​ຜົນ​ຕອບ​ຮັບທີ່​ດີ​ສົມຄວນ.