ທສວ ໄດ້ໃຫ້ທຶນສະໜັບສະໜູນແກ່ ພະແນກອຸດສາຫະກຳ ແລະ ການຄ້າ ແຂວງສາລະວັນ …

ທສວ ໄດ້ໃຫ້ທຶນສະໜັບສະໜູນແກ່ ພະແນກອຸດສາຫະກຳ ແລະ ການຄ້າ ແຂວງສາລະວັນ …

ອື່ນໆ

ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ), ກະຊວງອຸດສາຫະກໍາ ແລະ ການຄ້າ ໄດ້ໃຫ້ທຶນສະໜັບສະໜູນແກ່ ພະແນກອຸດສາຫະກຳ ແລະ ການຄ້າ ແຂວງສາລະວັນ ໃນມູນຄ່າ 14,01 ລ້ານກີບ, ເພື່ອຈັດຕັ້ງປະຕິບັດກິດຈະກຳ 03 ພາຍໃຕ້ໂຄງການປັບປຸງການຜະລິດ, ຍົກລະດັບຜະລິດຕະພາບຜະລິດຕະພັນ ເພື່ອສ້າງເປັນສິນຄ້າໜຶ່ງເມືອງໜຶ່ງຜະລິດຕະພັນ ໃຫ້ກຸ່ມຈັກສານຫວາຍ ບ້ານແບ່ງດ່ານ, ເມືອງລະຄອນເພັງ, ແຂວງສາລະວັນ.

ພາຍຫຼັງສຳເລັດການຈັດຕັ້ງປະຕິບັດກິດຈະກຳ 02 ຫົວຂໍ້ “ການບໍລິຫານຈັດການກຸ່ມທຸລະກິດຊຸມຊົນ”  ໃນລະ ຫວ່າງວັນທີ 25-29 ພຶດສະພາ 2020; ພະແນກອຸດສາກະກຳ ແລະ ການຄ້າ ແຂວງສາລະວັນ ກໍ່ໄດ້ສືບຕໍ່ຈັດຕັ້ງປະຕິບັດກິດຈະກຳ 03 ໃນຫົວຂໍ້ “ການຈັກສານຫວາຍ” ໃນລະຫວ່າງວັນທີ 8-10 ມິຖຸນາ 2020 ໄດ້ຈັດຂຶ້ນທີ່ສູນຫັດຖະກໍາຈັກສານຫວາຍ ບ້ານແບ່ງດ່ານ, ເມືອງລະຄອນເພັງ, ແຂວງສາລະວັນ ຝຶກໂດຍ ຄູຝຶກທີ່ມາຈາກສູນຫັດຖະກຳທ່ອງທ່ຽວ ແຂວງຈຳປາສັກ, ເພື່ອໃຫ້ນັກສຳມະນາກອນໄດ້ຮຽນຮູ້ກ່ຽວກັບການປັບປຸງຜະລິດຕະພັນ ໂດຍສະເພາະແມ່ນຮູບຮ່າງຂະໜາດ, ສີສັນ, ໃຫ້ມີຄວາມລະອຽດອ່ອນ, ການອອກແບບຜະລິດຕະພັນໃຫ້ມີຫຼາກຫຼາຍຮູບແບບ, ຫຼາຍສີສັນ ແລະ ມີຄວາມສວຍງາມ ມີຕະຫຼາດຮອງຮັບ ຈາກພາຍໃນ ແລະ ຕ່າງປະເທດ ເພື່ອເຮັດໃຫ້ນັກທ່ອງທ່ຽວຕ່າງເມືອງທີ່ມາທ່ຽວຊົມ ໄດ້ຊື້ເປັນຂອງຕ້ອນ ແລະ ໄດ້ເຫັນສີມືອັນປານີດ ທີ່ເປັນລວດລາຍອັນເປັນເອກະລັກ ພ້ອມທັງຮູບຊົງທີ່ສວຍງາມ ຂອງຜະລິດຕະພັນດັ່ງກ່າວ ແລະ ສົ່ງເສີມໃຫ້ຜະລິດຕະພັນກາຍເປັນສິນຄ້າໜຶ່ງເມືອງໜຶ່ງຜະລິດຕະພັນ, ກິດຈະກຳຄັ້ງນີ້ ມີຜູ້ເຂົ້າຮ່ວມຝຶກອົບຮົມທັງໝົດ ຈຳນວນ 39 ທ່ານ.

ພາຍຫຼັງທີ່ສຳເລັດການຈັດຝຶກອົບຮົມກິດຈະກຳ 02 ແລະ 03 ທີ່ກ່າວມາຂ້າງເທີງ ເຈົ້າຂອງໂຄງການ ກໍ່ຄື ພະແນກອຸດສາຫະກຳ ແລະ ການຄ້າ ແຂວງສາລະວັນ ກໍ່ມີແຜນທີ່ຈັດຕັ້ງປະຕິບັດກິດຈະກຳຕໍ່ໄປ ກໍ່ຄື ການຄັດເລືອກຜະລິດຕະພັນກາໝາຍສິນຄ້າໂອດອບຂັ້ນເມືອງ, ຂັ້ນແຂວງ  ແລະ ກ້າວໄປເຖິງການມອບ-ຮັບ ໃບຢັ້ງຢືນກາໝາຍໂອ ດອບແຫ່ງຊາດໃນອານາຄົດອັນໃກ້ນີ້.