ຝຶກອົບຮົມຫັດຖະກຳຕຳ່ແຜ່ນ ແລະ ຍ້ອມສີທຳມະຊາດ

ຝຶກອົບຮົມຫັດຖະກຳຕຳ່ແຜ່ນ ແລະ ຍ້ອມສີທຳມະຊາດ

ຂ່າວສຳຄັນ

ໃນຕອນເຊົ້າຂອງວັນທີ 15 ມີນາ 2021 ພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ໄດ້ຈັດຊຸດຝຶກອົບຮົມຫັດຖະກຳຕຳ່ແຜ່ນ ແລະ ຍ້ອມສີທຳມະຊາດ ໃຫ້ແກ່ກຸ່ມຫັດຖະກຳບ້ານສົບແຈມ ກຸ່ມບ້ານເມືອງງອຍເກົ່າ ເມືອງງອຍ ແຂວງຫຼວງພະບາງ ໂດຍໄດ້ຮັບການສະໜັບສະໜູນ ຈາກກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ໃຫ້ກຽດເປັນປະທານກ່າວເປີດໂດຍ ທ່ານ ຄຳຕັນ ສົມພັນວິໄລ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງຫຼວງພະບາງ ຮ່ວມກັບ ທ່ານ ສາ ສີລິພົງ ຮອງຫົວໜ້າກົມສົ່ງເສີມ SME ແລະ ທ່ານ ສອນເພັດ ທັດສີນິພອນ ຮອງເຈົ້າເມືອງ ເມືອງງອຍ ແຂວງຫຼວງພະບາງ, ມີຄະນະຈັດຕັ້ງບ້ານ ແລະ ສະມາຊິກກຸ່ມຫັດຖະກຳຕຳ່ຫູກບ້ານສົບແຈມເຂົ້າຮ່ວມ ຈຳນວນ 48 ທ່ານ.

ບ້ານສົບແຈມ ແມ່ນບ້ານໜຶ່ງທີ່ຂຶ້ນກັບກຸ່ມບ້ານເມືອງງອຍເກົ່າ ເມືອງງອຍ ແຂວງຫຼວງພະບາງ ແລະ ເປັນບ້ານທີ່ມີນັກທ່ອງທ່ຽວເຂົ້າໄປທ່ຽວຊົມ ແລະ ຊື້ຜະລິດຕະພັນຈາກການຕຳ່ຫູກບ້ານດັ່ງກ່າວໄປເປັນຂອງຕ້ອນຂອງຝາກເວລາກັບບ້ານ. ບັນດາເອື້ອຍນ້ອງແມ່ຍິງບ້ານສົບແຈມເຄີຍມີມູນເຊື້ອທາງດ້ານຫັດຖະກຳຕຳ່ຫູກມາຫຼາຍຊ່ວງອາຍຸຄົນ ແລະ ໄດ້ຍຶດຖືເປັນອາຊີບສຳຮອງຖັດຈາກການຜະລິດກະສິກຳ ຊຶ່ງເປັນການສ້າງລາຍຮັບເພີ່ມເພື່ອແກ້ໄຂຊີວິດການເປັນຢູ່ຂອງປະຊາຊົນເຂດບ້ານດັ່ງກ່າວໃຫ້ດີຂຶ້ນ ແຕ່ຍ້ອນເຫັນໄດ້ວ່າການຜະລິດຫັດຖະກຳຕຳ່ແຜ່ນຢູ່ບ້ານດັ່ງກ່າວຍັງຂາດເຕັກນິກວິຊາການທີ່ເຂົ້າມານຳໃຊ້ໃນການຜະລິດ ແລະ ຍັງບໍ່ສາມາດຕອບສະໜອງກັບຄວາມຕ້ອງການຂອງຕະຫຼາດ. ດັ່ງນັ້ນ, ພະແນກອຸດສາຫະກຳ ແລະ ການຄ້າແຂວງ ໂດຍສົມທົບກັບອຳນາດການປົກຄອງເມືອງຈຶ່ງໄດ້ຈັດຝຶກອົບຮົມໃນຄັ້ງນີ້ ເພື່ອເປັນການສ້າງຄວາມເຂັ້ມແຂງ ແລະ ພັດທະນາສີມືແຮງງານໃຫ້ບັນດາເອື້ອຍນ້ອງແມ່ຍິງພາຍໃນບ້ານສົບແຈມໃຫ້ມີຄວາມປານີດ, ຈົບງາມຍິ່ງຂຶ້ນກວ່າເກົ່າ ແລະ ຮັກສາໄດ້ຄວາມເປັນເອກະລັກສະເພາະຂອງທ້ອງຖິ່ນ, ເຮັດໃຫ້ເຂົາເຈົ້າໄດ້ຮຽນຮູ້ວິທີໝູນໃຊ້ຊັບພະຍາກອນທີ່ມີຢູ່ໃນຂອບເຂດບໍລິເວນບ້ານ ແລະ ບໍລິເວນໃກ້ຄຽງເຂົ້າໃນການຜະລິດຢ່າງມີປະສິດທິພາບ ພ້ອມກັນນັ້ນກໍ່ເປັນການປັບປຸງ ແລະ ຍົກລະດັບຄຸນນະພາບຂອງສິນຄ້າ ເພື່ອດຶງດູດນັກທ່ອງທ່ຽວໃຫ້ຊື້ ແລະ ໃຫ້ກາຍເປັນສິນຄ້າສົ່ງອອກໄດ້.

ຊຸດຝຶກອົບຮົມດັ່ງກ່າວຈັດຂຶ້ນເປັນເວລາ 14 ວັນລັດຖະການ ນັບແຕ່ວັນທີ 15 ມີນາ ຫາ 01 ເມສາ 2021 ທີ່ສະໂມສອນບ້ານສົບແຈມ ເມືອງງອຍ ແຂວງຫຼວງພະບາງ ໂດຍມີຄູຝຶກຈາກກົມສົ່ງເສີມວິສາຫະກິດຂະໜາດນ້ອຍ ແລະ ກາງ (SME) ແລະ ຜູ້ຊ່ຽວຊານດ້ານຫັດຖະກຳຕຳ່ແຜ່ນ ແລະ ການຍ້ອມສີທຳມະຊາດແຂວງຫຼວງພະບາງມາແລກປ່ຽນບົດຮຽນ ແລະ ໃຫ້ຄວາມຮູ້ແກ່ບັນດານັກສຳມະນາກອນທີ່ເຂົ້າຮ່ວມໃນຊຸດຝຶກອົບຮົມໃນຄັ້ງນີ້.